Кондак 1

Взбранной воеводе, Владычице нашей Богородице, теплой заступнице земли Волынския, благодарственное пение восписуем, пред Пречистым Твоим образом. Ты же Царице неба и земли, приими моления наша, да зовем Ти:

Радуйся, Мати Божия, Зимненския обители и всем православным Отрадо и Утешение.

Икос 1

Ангельския чины боголепно славословят Тя Богородице, яко Ты еси обрела благодать у Бога, и родила нам Божественное Слово и не оставила еси нас и во Успении Своем, Пресвятая Дево. Приими и наша недостойныя моления на Горе сей, да смиренно вопием Ти сице:

Радуйся, Отца Безначального благоволение;

Радуйся, Божественного Слова вместилище;

Радуйся, Духа Святаго Осенение;

Радуйся, истинное православия украшение;

Радуйся, Реко из камени текущая;

Радуйся, Благодатию Своею, Зимно преобразившая;

Радуйся, драгая диадимо волынская;

Радуйся, Венче благодати предивный;

Радуйся, Заре Божественного Солнца;

Радуйся, Руно милосердия росою нас напоившая;

Радуйся, Источниче пустыню оплодотворивший;

Радуйся, Ковчеже благодати Божия;

Радуйся, Мати Божия, Зимненския обители и всем православным Отрадо и Утешение.

Кондак 2

Пречистый образ Твой равноапостольный князь Владимир дарова обители сей и умоли Тя благословити Гору Святую сию, себе же устрои терем, во еже пети зде непрестанно: Аллилуйя.

Икос 2

Разум подаждь нам, Богородице, познати Твое пребывание на Святей Горе сей, како чудесы и помощь Твоею иконою являеши, услыши и наша моления, яко тысящу лет православнии воспевают зде сицевая:

Радуйся, Солнце язычество попалившее;

Радуйся, Сене незыблемая православныя земли;

Радуйся, Ниво спасение нам растящая

Радуйся, Зимненской обители Просветительнице;

Радуйся, гнев Божий праведный умягчающая;

Радуйся, молитвою печали наша утоляющая:

Радуйся, Ходатаице наша пред Богом;

Радуйся, вражды человеческия разрушающая;

Радуйся, в бедах и нуждах нам помогающая;

Радуйся, девственныя чистоты украшение;

Радуйся, от напастей скорое избавление;

Радуйся, Лествице возводящая к небеси;

Радуйся, Мати Божия, Зимненския обители и всем православным Отрадо и Утешение.

Кондак 3

Силу благодатную узрев патриарх Царьградский в иконе Твоей, Богородице, егда на брак со славнейшим князем Владимиром царевну Анну образом сим благослови. Ты же в ней благодать явила еси волынским людем, дабы пели Богу: Аллилуия.

Икос 3

Имея Твою дивную икону, яко благословение семейного таинства, и жития своего, равноапостольный князь Владимир, благодать на обитель и свой терем в Зимно привлече, добронравнии же людие взывают Богородице сице:

Радуйся, патриаршее предвиденое благословение;

Радуйся, царевны Анны на Русь Путеводительнице;

Радуйся, великокняжеского супружества Благословение;

Радуйся, дебри язычества в сады Христовы превратившая;

Радуйся, страны нашей Хранительнице;

Радуйся, семейных уз крепкая Поручительнице;

Радуйся, добрая Воспитательнице юношества;

Радуйся, теплая Отрадо иночества;

Радуйся, мудрость просящим подавающая;

Радуйся, чистых и непорочных в райския обители приводящая;

Радуйся, многоценный камень веры;

Радуйся, обители древния утверждение:

Радуйся, Мати Божия, Зимненския обители и всем православным Отрадо и Утешение.

Кондак 4

Бурею зол многих колеблеми, святители Волынстии Стефан и Амфилохий прибегали к чудотворной иконе Твоей; преподобнии Антоний и Варлаам Киево-Печерские, преподобный Моисей Угрин и Зимненский игумен Нифонт, славный архиепоскоп Новгородский, хвалу подобающую возносяще, под Ея благодатным покровом пребывали, непрестанно воспевАЯ Богу, Аллилуйя.

Икос 4

Слышавше чудеса Твоя, Богородице, и узревше храм Твой, яко ковчег Ноев, и икону, яко зарю многосветлую, сию Святую Гору просветившую, покаяние приносим Сыну Твоему и Богу нашему, слезы умиления изливающе пред пречистым Твоим образом, вопиюще Ти:

Радуйся, надеждо ненадежных;

Радуйся, тысячелетний столпе непоколебимый;

Радуйся, Волынская Купино неопалимая;

Радуйся, Ладье Христова непотопляемая;

Радуйся, теплая лампадо верных;

Радуйся, Семя цвета нашея веры;

Радуйся, Света нашего Мати;

Радуйся, огнь Божественный неопально держащая;

Радуйся, печали наша утоляющая;

Радуйся, дарами Святаго Духа нас обогащающая;

Радуйся, в час смертный наше упование;

Радуйся, праотцев наших похвало;

Радуйся, Мати Божия, Зимненския обители и всем православным Отрадо и Утешение.

Кондак 5

Богом данную звезду Волынскому краю узреша Твою икону, Богородице, иноцы древния обители, наипаче блаженные Иосаф и Василий, епископы Владимирские, спасительную веру проповедаша поюще Богу: Аллилуйя.

Икос 5

Видевше людие Пречистую икону Твою яко стамну манны небесныя, Богородице, прибегая к Тебе И получив просимое, украшали Твой лик достойными дарами, яже безгласно проповедуют чудеса Твоя, Мати Божия, и научают нас пети сице:

Радуйся, сугубую благодать нам зде являющая;

Радуйся, паче солнца нас согревающая;

Радуйся, грехи и язвы врачующая;

Радуйся, в бедах сущих прикосновением исцеляющая;

Радуйся, чающих Твоея милости услаждающая;

Радуйся, благая наша намерения исполняющая;

Радуйся, окаменение сердечное оживляющая;

Радуйся, пустыню неверия оплодотворившая;

Радуйся, райския чертоги указующая;

Радуйся, Едемскую красоту открывающая;

Радуйся, руку помощи зримо подающая;

Радуйся, икону Свою нам, аки перл, вручающая;

Радуйся, Мати Божия, Зимненския обители и всем православным Отрадо и Утешение.

Кондак 6

Проповедницею славною благодати Божия явила Себе Богородице, егда в годину латинских пленений чрез икону Свою чудотворную нечестивого святотатника слепотою наказала еси, не ведущего пети Богу: Аллилуйя.

Икос 6

Воссияла еси чудом, Пречистая Дево, услышав чад Своих верных стенание, егда главы из храма снимали латинствующие, а Твой пречистый образ уничижали, начальствущих и потомство их лишила зрения дабы в смирении пели Тебе сицевая:

Радуйся, Смирение высокое;

Радуйся, Сило молниеносная;

Радуйся, верных от скорбей избавляющая;

Радуйся, злохуления нечестивцев посрамляющая;

Радуйся, супостаты скоро прогоняющая;

Радуйся, долготерпению нас научающая;

Радуйся, в бедах и печалех радость посылающая;

Радуйся, руку помощи верным подающая;

Радуйся, Скиптре Божьего указания;

Радуйся, верных скорое услышание;

Радуйся, православных стено нерушимая;

Радуйся, смиренных восстание и гордым посрамление;

Радуйся, Мати Божия, Зимненския обители и всем православным Отрадо и Утешение.

Кондак 7

Хотяще страну нашу Волынскую в правоверии утвердити, явила еси благодать Свою, о, Богомати, в чудотворных иконах Твоих, и в Зимненской сугубую, яко старейшей, крещения равноапостольного Владимира свидетельнице, да с молитвой лобызающе Ю, принимаем токи благодатных исцелений, поя Богу: Аллилуйя.

Икос 7

Новые беды и испытания приняла обитель Зимненская, егда ересью латинскою братия, яко класи исторгнути бывше, обаче, прошедшим ста и тринадесятем летом православным возвратилася, дабы достойно пели Ти таковая:

Радуйся, православная сене непоколебимая;

Радуйся, благ у Тебе просящих подательнице;

Радуйся, безмездная Путеводительнице;

Радуйся, горьких печалей Утолительнице;

Радуйся, отступивших строгая Учительнице;

Радуйся, чадолюбная Наставнице;

Радуйся, падших Надеждо и Исправление;

Радуйся, косного еретичества вразумление;

Радуйся, верным теплое заступление;

Радуйся, Ходатаице блаженнаго упокоения;

Радуйся, скиние Духа Святого;

Радуйся, Мати Божия, Зимненския обители и всем православным Отрадо и Утешение.

Кондак 8

Странники и пришельцы есмы на земли, Пресвятая Владычице, и, не имуще где главу приклонити, прибегаем к Тебе, Скоропослушнице и Путиводительнице, и Споспешнице нашей, И к Твоим иконам припадаем, яко зерцалам небесным, источникам благодати, наипаче же Зимненской Поручительнице, воспевая Богу: Аллилуйя.

Икос 8

Все упование на Тя возлагали, Мати Божия, в часы лихолетий, егда образ сей чудотворный невидимым соделала и для верных сохранила еси, дабы непрестанно пели Тебе:

Радуйся, земли нашея забрало непобедимое;

Радуйся, супостатом непроходимые врата;

Радуйся, нечестивых гонителей устрашение;

Радуйся, святотатцев мерзких ослепление;

Радуйся, верных тихое умиление;

Радуйся, роду православному крепкое вспоможение;

Радуйся, хотящим спастися надеждо нерушимая;

Радуйся, обители древния диадимо известная;

Радуйся, жестоковыйность нашу укрощающая;

Радуйся, косность и гугнивость нашу разрешающая;

Радуйся, Покрове миру ширший облака;

Радуйся, из пепла храмы и обители воставляющая;

Радуйся, Мати Божия, Зимненския обители и всем православным Отрадо и Утешение.

Кондак 9

Всякия сомнения и блуждания людем покаявшимся страны волынския не помянула еси, Богородице, руку помощи простирающи до ныне, возведи от тли греховныя всех прибегающих к Тебе, и вопиющих непрестанно Богу: Аллилуйя.

Икос 9

Витии многовещанныя не доумеют по достоинству воспевати Твоя благодеяния, Пресвятая Дево, не отступи от нас, Владычице, избави от бед, болезней и скорбей, да поем Ти сицевая;

Радуйся, матерняя нам Попечительнице;

Радуйся, благая Вдохновительнице;

Радуйся, в бедах и болезнех Целительнице;

Радуйся, в напастех скорое Услышание;

Радуйся, больных Отрадо и Утешение;

Радуйся, душ наших чудесное обновление;

Радуйся, от нужд житейских изымающая;

Радуйся, враги православия побеждающая;

Радуйся, ереси, аки паутину растерзающая;

Радуйся, храмов наших Украшение;

Радуйся, земли Волынския преображение;

Радуйся, Мати Божия, Зимненския обители и всем православным Отрадо и Утешение.

Кондак 10

Спасти хотя всех потопляемых в море житейских страстей, чудныя иконы Свои даровала еси, Богородице, православным людем, яко светила небесныя, да непрестанно поем Богу: Аллилуйя.

Икос 10

Стена необоримая, источник чудес, руно орошенное – икона Твоя, Богородице, тысящу лет, яко лампада неугасимая, согревает и освещает страну Волынскую и вся страны, грады и веси, мы же восхваляем Тя, Пречистая:

Радуйся, Свеще, попаляющая дерзость греховную;

Радуйся, Цевнице разверзающая небеса;

Радуйся, Лествице, возводящая на небо;

Радуйся, Зерцало невечернего Света;

Радуйся, Секиро , ереси посекающая;

Радуйся, верных источник неиссякаемый;

Радуйся, чистый крин неувядаемый;

Радуйся, старых благоговейная отрадо;

Радуйся, детей путеводительнице;

Радуйся, иноков любвеобильное Умиление;

Радуйся, супружеств честных Благословение;

Радуйся, Мати Всемилостивая;

Радуйся, Мати Божия, Зимненския обители и всем православным Отрадо и Утешение.

Кондак 11

Пение хвалебное возносим Ти, Пресвятая Владычице, припадающе к Твоей чудотворной иконе, отгоняющей злые веяния и намерения мира сего, простри нам руку помощи, покрый святым омофором Твоим, да радостно воспеваем Богу:Аллилуйя.

Икос 11

Светоприемная свеща обители древния, икона Твоя Богородице, яко зерцало Божие, яко окно небесное, яко кадило благовонное явилася в земли Волынстей, просвети и наша души светом невещественным, Пресвятая Дево, да навыкнем пети Тебе таковая:

Радуйся, Заре просветлая путь указующая;

Радуйся, елеем милости нас помазующая:

Радуйся, Скиптре и державо Царя Вечнаго;

Радуйся, немудрыя и безпечная устрашающая;

Радуйся, Сионская горнице, согревающая мнозих;

Радуйся, Чаще, из нея черплют богатии и убозии;

Радуйся, Источник неиссякаемый воды животныя;

Радуйся, тихий облаче, утучняющий землю;

Радуйся, Крине благоуханный, услаждающий душу;

Радуйся, Древо благосеннолиственное, имже покрываются мнози;

Радуйся, плода безсмертия стяжание;

Радуйся, твердое упование молящимся;

Радуйся, Мати Божия, Зимненския обители и всем православным Отрадо и Утешение.

Кондак 12

Благодати вместилище неизглаголанное, чудотворныя иконы Твоя, о, Богомати в лучах их омываются вернии, яко в Силоаме, чающе исцеление и прозрение приимати. Пробуди, Пресвятая, нас от сна греховного, отверзи очи и уста во еже взывати Богу : Аллилуйя

Икос 12

Поюще чудеса от иконы Твоея, вонми, Скоропослушнице, утоли наша печали, взыщи погибшее овча, будь Спорительницею ко спасению душ наших, явися скорой радостию всех скорбящих, разреши наша узы греховныя, услыши, Пресвятая Дево, наши гласы, поющия таковая:

Радуйся, православней вере нас научающая;

Радуйся, полки зловерия побеждающая;

Радуйся, Лествице, к небеси возводящая;

Радуйся, Радосте наша и Утешение;

Радуйся, инокам матерь предивная;

Радуйся, молитвам верных внимающая;

Радуйся, земли древния Просветительнице;

Радуйся, Волынских обителей благословение;

Радуйся, Ковчеже, от бурь сокрывающий;

Радуйся, иконою Своею нас обогатившая;

Радуйся, веру православную утверждающая;

Радуйся, Мати Божия, Зимненския обители и всем православным Отрадо и Утешение.

Кондак 13

О, Всепетая Мати, родшая всех Святых Святейшее Слово, приими сии моления малыя, Тебе приносимыя, не помяни грехов наших, Своими молитвами исполни благая желания наша, и Твою благодать от иконы истекающую не отыми от нас, и сподоби непрестанно воспевати Богу: Аллилуйя, Аллилуйя, Аллилуйя.

Этот, конда́к чита́ется три́жды, зате́м и́кос 1-й и конда́к 1-й.

Икос 1

Ангельския чины боголепно славословят Тя Богородице, яко Ты еси обрела благодать у Бога, и родила нам Божественное Слово и не оставила еси нас и во Успении Своем, Пресвятая Дево. Приими и наша недостойныя моления на Горе сей, да смиренно вопием Ти сице:

Радуйся, Отца Безначального благоволение;

Радуйся, Божественного Слова вместилище;

Радуйся, Духа Святаго Осенение;

Радуйся, истинное православия украшение;

Радуйся, Реко из камени текущая;

Радуйся, Благодатию Своею, Зимно преобразившая;

Радуйся, драгая диадимо волынская;

Радуйся, Венче благодати предивный;

Радуйся, Заре Божественного Солнца;

Радуйся, Руно милосердия росою нас напоившая;

Радуйся, Источниче пустыню оплодотворивший;

Радуйся, Ковчеже благодати Божия;

Радуйся, Мати Божия, Зимненския обители и всем православным Отрадо и Утешение.

Кондак 1

Взбранной воеводе, Владычице нашей Богородице, теплой заступнице земли Волынския, благодарственное пение восписуем, пред Пречистым Твоим образом. Ты же Царице неба и земли, приими моления наша, да зовем Ти:

Радуйся, Мати Божия, Зимненския обители и всем православным Отрадо и Утешение.

Молитва ко Пресвятей Богородице

О, Пресвятая Владычице, Богородице, Зимненская Похвало чудотворною иконою Твоею всю вселенную согревающая, бурю неверия укрощающая, от бед избавляющая и к тихой пристани Царствия Божия направляющая. Услыши нас, Пресвятая, любоблагоутробная Мати, помози нам, да исцелятся души и телеса наша от недугов, отягощающих нас, подай руку помощи, да исчезнут лютые скорби, смирение и терпение да явятся. Малодушныя утеши, немощныя укрепи, умягчи сердца наша, дабы едиными усты, единым сердцем поем в Троице славимого Бога Отца и Сына и Святаго Духа во веки веков. Аминь.